Google маълумотлар марказларини қувватлантириш учун ядро реакторларидан фойдаланади

Google углерод чиқиндиларини камайтириш ва сунъий интеллект ривожланиши билан боғлиқ ортиб бораётган энергия эҳтиёжларини қондириш учун кичик модулли ядро реакторлари ((SMR) ёрдамида ўз маълумотлар марказларини қувватлантиришни режалаштирмоқда.

Financial Times маълумотларига кўра, компания Американинг Kairos Power стартапи билан умумий қуввати 500 МВт бўлган 6-7 та реакторни етказиб бериш бўйича шартнома тузган. Биринчи реакторни 2030 йилгача, қолганларини эса кейинги беш йил ичида ишга тушириш режалаштирилган. Битим нархи ҳозирча ошкор этилмаган.

Ушбу ҳаракат Google'ни маълумотлар марказларини қувватлантириш учун ядро энергиясини танлаган биринчи йирик технология компаниясига айлантиради. Google энергетика ва иқлим бўйича катта директори Майкл Террелл лойиҳа экологик барқарорликка эришиш стратегиясининг муҳим элементи эканлигини таъкидлади. Унинг сўзларига кўра, атом энергетикаси энг кам углерод чиқиндилари билан АИ тизимларининг барқарор ишлашини таъминлашга ёрдам беради.

Компания реакторлардан фойдаланишнинг иккита вариантини кўриб чиқмоқда: маълумотлар марказларига тўғридан-тўғри уланиш ёки умумий электр тармоқларига интеграция.