Германия федератив республикаси Ташқи ишлар вазири Анналена Бербок пайшанба куни Германиянинг Дамашқдаги элчихонасини Суриядаги қуролли можаро бошланганидан 13 йил ўтгач қайта очди. Бу ҳақда Associated Press нашри хабар бермоқда.
“Элчихонани очиш билан биз аниқ айтамизки: Германия Дамашққа қайтди. Германия учун барқарор Сурия жуда муҳим”, деди Бербок журналистларга
Аниқлик киритилишича, дастлаб элчихона ходимлари сони кам бўлади. Дипломатик ваколатхона ишини Ливандаги элчихона ходимлари қўллаб-қувватлайди. Элчихона ишини ишончли вакил бошқаради ва ҳозирча консуллик ва виза хизматларини кўрсатмайди.
“Элчининг қайтиш истиқболлари бу ердаги сиёсий вазиятнинг ривожланишига ва албатта, хавфсизлик ҳолатига боғлиқ бўлади”, дея тушунтирди Бербок.
Бундан ташқари, у март ойида Сурия маъмурияти ва Сурия шимоли-шарқидаги курдлар ўртасида тузилган келишувни олқишлади. Шунингдек, у мамлакат ғарбида хавфсизлик кучлари ва Суриянинг собиқ президенти Башар Асадга содиқ жангчилар ўртасидаги тўқнашувларга алоқадор шахсларни жавобгарликка тортиш зарурлигини таъкидлади.
Қўшимча қилинишича, Сурияни можаро туфайли тарк этган миллионлаб қочқинлар дарҳол қайтиб келолмайди. Унинг сўзларига кўра, уларнинг қайтиши Сурия билан қўшни давлатлардан бошлаб босқичма-босқич амалга оширилиши керак.
Бу Бербокнинг Дамашққа иккинчи ташрифи. Кейинроқ у ўтиш давридаги Сурия президенти Аҳмад аш-Шараъа билан учрашиши кутилмоқда.
"Турк йигитлари руслардан аёлларини тортиб олмоқда"
Қон тўкишдан завқланадиган шахс яна вазир этиб тайинланди
Хонанда Феруза Каримова 40 млн сўмдан зиёд жарима тўлайдиган бўлди
