Гелий танқислиги сунъий интеллект "пуфаги"нинг ёрилишига ва АҚШ иқтисодиёти инқирозига сабаб бўлиши мумкин

Тиббий ускуналар (айниқса, МРТ сканерлари), компьютер чиплари ва бир қанча саноат жараёнларида ўта муҳим компонент ҳисобланган гелий Ормуз бўғози ёпилгани сабабли танқис бўлиб бормоқда.

Қатарнинг суюлтирилган табиий газ (СТГ) ишлаб чиқаришни тўхтатиши дунёдаги гелий ишлаб чиқариш ҳажмининг қарийб учдан бири тўхтаб қолишига олиб келди. Бу ярим ўтказгичлар ишлаб чиқаришда гелийга таянадиган чип ишлаб чиқарувчиларга жиддий таъсир кўрсатди.

Қайд этилишича, чип ишлаб чиқариш жараёнида гелийнинг муносиб ўрнини босувчи восита йўқ ва ҳеч қайси бошқа манба Қатардан келадиган таъминот ўрнини зудлик билан боса олмайди. Бунинг устига, уруш бошланишидан аввал тўлдирилган гелий контейнерлари Яқин Шарқда қолиб кетган.

Агар ушбу узилишлар давом этса, гелий етишмовчилиги чип ишлаб чиқарувчиларни даромади пастроқ бўлган маҳсулот йўналишларига устуворлик беришга мажбур қилиши мумкин. Бу эса мавжуд тақсимотни СИ (сунъий интеллект) хотираси томонга кучайтириб, компьютер ва мобил хотира қурилмаларидаги шундоқ ҳам жиддий бўлган дефицитни янада чуқурлаштиради.

Гелий танқислиги СИ-компанияларининг улкан лойиҳалари учун ҳалокатли бўлади, чунки бу маълумотларни қайта ишлаш марказларини (Data center) қуриш бўйича барча режаларни барбод қилади. Бундай марказлар қурилишининг тўхташи эса "СИ пуфаги"нинг ёрилишига ва Америка иқтисодиётининг инқирозига олиб келиши мумкин.