Фридрих Мерц Европада ноқонуний миграцияга қарши иттифоқ тузмоқда

BILD нашрининг хабар беришича, Христиан-демократик иттифоқ партияси раҳбари Фридрих Мерц Германияга қочқинлар оқимини чеклаш мақсадида янги умумевропа "миграция ўқи"ни яратиш устида ишламоқда.

"Полша, Австрия, Швейцария, Чехия ва Франция билан иттифоқ тузиш режалаштирилган. Мақсад — "чегарада ноқонуний муҳожирларнинг бошпана сўровларини рад этиш" ва умумий миграция сиёсатини қатъийлаштириш", деб ёзади нашр.

Маълумотларга кўра, Германия ички ишлар вазири Нэнси Фезер ҳам бу ташаббусни қўллаб-қувватламоқда. У аллақачон Австрия ички ишлар вазири Герхард Карнер билан батафсил муҳокама ўтказган. Аввалроқ Олаф Шолцнинг Германия Социал демократик партияси муҳожирларни қабул қилишни рад этиш "қўшни давлатлар билан келишилган бўлиши керак" деган позицияда турган эди, аммо ҳозир Мерц бу келишувни тўғридан-тўғри таъминлашни мақсад қилган.

Январ ойида Полша бош вазири Доналд Туск томонидан эълон қилинган режа Мерц учун муҳим намуна сифатида кўрилмоқда. Унда "Европа қонунчилигига мувофиқ рад этишга имкон берадиган фавқулодда ҳолат аллақачон қайд этилган", деб таъкидланган.