Франциядаги сўллар исломофобияга қарши курашиб, Фаластинни тан олишни ваъда қилмоқда

Франциядаги парламент сайловларида биринчи ўринни қўлга киритган сўл партияларнинг «Янги халқ фронти» коалицияси етакчиси Жан-Люк Меланшон Миллий кенгашга сайловнинг дастлабки якунлари эълон қилинганидан сўнг Фаластин давлатчилигини тан олиш зарурияти ҳақида гапирди.

«Бизда Янги халқ фронтидан бош вазир сайланади. Кўп нарсаларни фармон билан ҳал қила бошлаймиз. Халқаро даражада Фаластин давлатини тан олиш бўйича келишишимиз зарур бўлади», – деган Меланшон.

У шунингдек, мамлакатда ўзгаришлар зарурияти ҳақида гам гап очган.

«Франция албатта эркаклар шовинизми, ирқчилик, исломофобия, антисемитизм ва ҳар қандай динга нисбатан нафрат саҳифасини ёпган янги Францияга айланиши керак», – деган сўл коалиция етакчиси.

Эслатиб ўтамиз, кеча якшанба куни Франция парламентига ўтган сайловларнинг иккинчи турида «Янги халқ фронти» коалициясига бирлашган сўллар ғолиб чиқишди. Иккинчи ўринда — амалдаги президент Эммануэл Макроннинг «Биргаликда республика учун» марказчи коалицияси. Улар 168 та ўринга эга бўлишмоқда. Ўнгчилар Марин Ле Пен ва Жордан Барделланинг «Миллий уюшма» партияси 143 та жой оладиган бўлди. Қолган мандатларни мустақил депутатлар ва кичик партиялар вакиллари бўлиб олишган.

Шундай қилиб, бирорта партия 577 кишилик янги парламентда кўпчилик жойга эга бўлиш имконини берадиган 289 та жой учун овоз тўплай олмади. «Янги халқ фронти» етакчиларидан бири Жан-Люк Меланшон аллқачон ўнг партиялар ёки Макроннинг марказчилар блоки билан коалиция тузиш имкониятини рад этиб бўлган. «Миллий уюшма»дан Ле Пен ҳам шундай баёнот билан чиқиш қилди.

Макроннинг блоки кўпчилик овозни тўплай олмагач, Франция бош вазири, Габриэл Аттал 8 июлдан истеъфога чиқишини айтди. Лекин у янги ҳукумат тузилгунга қадар ўз лавозимини бажариб туришини қайд этди.

35 ёшли Аттал Франция тарихидаги энг ёш бош вазир ҳисобланади. Бу лавозимга у шу йилнинг январ ойида киришган эди.