Францияда поезд рельсдан чиқиб кетди

Франциянинг шимолида шаҳарлараро поезднинг рельсдан чиқиб кетиши оқибатида қирқ тўрт киши жароҳат олди.

Бу ҳақда BFMTV телеканали хабар берди.

"11 сентябр, жума куни соат 19:30 атрофида Руан ва Кан ўртасида ҳаракатланаётган йўловчи поезди Клеон ва Турвил-ла-Ривер коммуналари яқинида қисман рельсдан чиқиб кетди. Бортда тахминан 200 йўловчи бўлган. Сена-Маритиме префекти департамент операциялар марказини чақирди ва кўп сонли жабрланувчиларга ёрдам кўрсатиш режаси амалга оширилганини эълон қилди", дейилади префектура баёнотида.

Департамент префектининг сўзларига кўра, ҳодисада 44 киши жароҳат олган, жароҳатланганлардан бирининг аҳволи оғир.

Дастлабки маълумотларга кўра, поезд бир нарсага урилиб, вагонлардан бири ағдарилиб кетган ва яна тўрттаси рельсдан чиқиб кетган.

Руандаги тегишли департамент ҳодисанинг ҳолатларини аниқламоқда.