Франция Ливанни қўллаб-қувватлаш учун 100 миллион евро ажратади

Франция Ливанни қўллаб-қувватлаш учун 100 миллион евро (108 миллион АҚШ доллари) миқдорида ёрдам бермоқчи. Бу ҳақда Франция президенти Эммануэль Макрон Ливанга ёрдам бўйича Парижда бўлиб ўтган халқаро конференцияда маълум қилди.

Макроннинг таъкидлашича, "қисқа муддатда Ливан халқи уруш туфайли кўчирилган юз минглаб одамлар ва уларни қабул қилган жамоалар катта ёрдамга муҳтож".

Ҳизбуллоҳ ва Исроил ўртасидаги уруш бир миллион ливанликни ўз уйини тарк этди, 2500 дан ортиқ кишининг ҳаётига зомин бўлди ва иқтисодий инқирозни чуқурлаштирди.

Ўз навбатида, Ливан бош вазири вазифасини бажарувчи Нажиб Микати конференцияда Ливан армиясини кучайтириш ва кенгайтириш, шунингдек, мамлакатнинг вайрон бўлган инфратузилмасини тиклаш учун халқаро кўмак зарурлигини айтди.

Микатининг айтишича, Ливан ҳукумати ўт очишни тўхтатиш келишуви ва БМТ Хавфсизлик Кенгашининг Ливан жанубига армия киритилишини талаб қилувчи резолюциясини амалга ошириш режаси доирасида қўшимча қўшинлар жойлаштиришга қарор қилган ва 8000 нафаргача аскар юбориши мумкин.

Франция Ташқи ишлар вазири Жан-Ноэль Барро тадбирда 70 га яқин давлат ва 15 халқаро ташкилот иштирок этишини айтди ва Франция “Ливан ерга қараб қолмайди ” деб ваъда берди.

“Биз таклиф қилган барча давлатлар рози бўлди”, – деди у таклиф этилган иштирокчи давлатлар рўйхатига ишора қилиб. Унга Эрон ва Исроил кирмаган.

Франция ташкилотчилари БМТ ҳисоб-китобларига кўра, иштирокчиларнинг молиявий ваъдалари зудлик билан зарур бўлган 426 миллион долларни тўплашига умид қилмоқда.

Париж, шунингдек, Ливан суверенитетини тиклаш ва унинг институтларини мустаҳкамлашга ёрдам беришга тайёрлигини маълум қилди.