Финляндия Россия билан чегарага қўшалоқ тўсиқлар ўрнатди ва трансчегаравий ҳамкорлик шартномасини бекор қилди

Финляндия ҳукумати Россия билан чегарада қўшалоқ тўсиқлар тизимини ўрнатди.

Бу ҳақда Yle порталига Финляндия жануби-шарқий чегара хизмати қўмондони ўринбосари Юкка Луккари маълум қилди.

"Айни дамда чегара пунктлари ёпиқ. Давлат чегарасида ҳам, мамлакат ичида ҳам панжаралар ўрнатилди. Агар одамлар келса, биз уларни Финляндияга қонуний равишда кириши мумкин бўлган жойга йўналтирамиз" - деди у.

Финляндия Вазирлар Маҳкамаси мигрантларнинг назоратсиз кириб келаётгани сабабли Россия билан қуруқликдаги чегарадаги барча саккизта автомобил назорат-ўтказиш пунктларини 13 декабрга қадар ёпди.

Финляндия ҳукумати бугун ҳам Россия билан трансчегаравий ҳамкорлик шартномасини бекор қилди. Расмий Хельсинки 25 октябрь куни Россия Ташқи ишлар вазирлигидан бу борада нота олганини ва келишувни бекор қилиш резолюциясини қўллаб-қувватлаганини айтди. Қарор 2024 йил 24 январдан кучга кириши маълум қилинди.