ФИФА раҳбари президентлик сайлови арафасида жиддий текширувга дуч келиши мумкин

ФИФА президенти Жанни Инфантино 2027 йил январь ойида АҚШ Конгрессида кўрсатма беришга мажбур бўлиши мумкин. Бунга халқаро футбол ташкилотининг Дональд Трамп ва унинг атрофидаги шахслар билан муносабатлари юзасидан олиб борилаётган текширув сабаб бўлмоқда.

The Telegraph нашри маълумотига кўра, терговни конгрессмен Жейми Раскин олиб бормоқда. Демократларнинг оралиқ сайловлардаги ғалабасидан кейин у Вакиллар палатасининг юридик қўмитасига раҳбарлик қилиши ва расмий чақирув қоғозлари юбориш ваколатига эга бўлиши мумкин.

Текширувда ФИФАнинг Нью-Йоркдаги «Trump Tower» биносидан офис ижарага олгани ҳамда 2025 йил декабрда Трампга ташкилотнинг илк тинчлик мукофоти топширилгани алоҳида ўрганилмоқда.

Шунингдек, Инфантинонинг Майамидаги уй хизматкори билан боғлиқ молиявий ҳужжатлар ҳам қўмита эътиборини тортган. Айрим маълумотларда хизмат ҳақи ФИФАга алоқадор тузилма орқали тўлангани айтилмоқда. Ташкилот эса барча харажатларни Инфантино шахсан қоплаганини билдириб, қоидабузарлик ҳақидаги даъволарни рад этган.

Конгрессни қизиқтираётган яна бир масала — Жаҳон чемпионатининг айрим тижорат ҳуқуқларини хусусий инвесторларга сотиш бўйича амалга ошмай қолган лойиҳа. Унда асосий инвестор сифатида Трампнинг куёви Жаред Кушнернинг акаси Жошуа Кушнер асос солган «Thrive Eternal» компанияси кўрилган.

Футбол ташкилотларининг эътирозларидан кейин ФИФА ушбу ташаббусдан воз кечган. Нашр манбалари Кушнерлар ҳам январь ойида Конгрессга чақирилиши мумкинлигини билдирмоқда.

Ҳозирча Инфантинони гувоҳликка чақириш бўйича якуний қарор қабул қилинмаган.

Қайд этиш керак, 2016 йилдан буён ФИФАга раҳбарлик қилаётган Инфантино навбатдаги президентлик сайловида ҳам иштирок этиш ниятида. Сайлов 2027 йил 18 март куни Марокашнинг Работ шаҳрида ўтказилиши режалаштирилган.