Файзуллаев: «Энг катта орзум — «Барселона»да ўйнаш»

Ўзбекистон терма жамоаси ярим ҳимоячиси Аббосбек Файзуллаев «СЭ» («Спорт-Экспресс») нашрига берган интервьюсида бир кун келиб «Барселона»да тўп тепишни орзу қилиши ҳақида гапириб берди.

— Жаҳон чемпионати жиддий кўрик эканлигини ҳамма билади. Бу сиз учун ҳам қўшимча мотивация ҳисобланадими?

— Жаҳон чемпионати — катта бозор, бундай ўйинларни ҳамма томоша қилади. Аммо ҳозир мен бу ҳақда ўйлаётганим йўқ. Бор эътиборимни Жаҳон чемпионатига қаратганман. Айни дамдаги энг бош орзум — мана шу.

— Сиз энг кўп ўтишни хоҳлайдиган бирор-бир лига борми?

— Испания. Доим шуни орзу қиламан. Аммо кўрамиз, вақт кўрсатади.

— Испанияда энг кўп боргиси келган муайян бир жамоа ҳам бордир?

— Албатта, «Барселона» — менинг энг катта орзум! Ва унга эришиш учун ҳаракат қиламан. Вақт кўрсатади, лекин охиригача интиламан.

— Ўзбекистонда ҳар қандай орзу амалга ошиши мумкинлигини исботлаётган футболчи бор — Абдуқодир Хусанов. У сиз учун ўрнакми?

— Унинг тақдири Ўзбекистондаги барча футболчилар учун жуда катта мотивациядир. Бу энг жасур орзулар ҳам, қаердан бўлишингдан қатъи назар — ҳатто Ўзбекистоннинг кичикроқ шаҳридан бўлсанг ҳам — амалга ошиши мумкинлигига исботдир. Агар бунга ишонсанг ва қаттиқ ҳаракат қилсанг, ҳамма нарса содир бўлиши мумкин.

— У ҳатто расман «Манчестер Сити»да мавсумнинг энг яхши уч нафар футболчиси қаторидан жой олди. Унинг тақдиридаги бундай бурилиш сиз учун шок бўлдими?

— Йўқ. Биз у билан Жаҳон чемпионатида, фақат ёшлар ўртасидаги турнирда бирга ўйнаганмиз. Ўша пайтдаёқ унинг албатта кучли бешлик (Топ-5) лигаларида ўйнашини ҳис қилгандим. Чунки унда жисмоний маълумотлар жуда кучли, ўйиндаги ишонч ва агрессивликни у ўшандаёқ кўрсата олганди.

Файзуллаев 2023 йилнинг август ойидан 2025 йилнинг июль ойига қадар ЦСКА шарафини ҳимоя қилди, шундан сўнг у «Истанбул Башахшеҳир» клубига кўчиб ўтди. 2025/26 йилги мавсумда хавбек Туркия жамоаси сафида 26 та ўйинда майдонга тушиб, 4 та гол урди ва 7 та голли узатмани амалга оширди.