АҚШ энергетика вазири Крис Райт бу ҳақда Financial Times нашрига берган интервьюсида айтиб ўтди.
"Европа Иттифоқи Россия нефт ва газидан воз кечиши ва бунинг ўрнига Қўшма Штатлардан суюлтирилган табиий газ, бензин ва бошқа қазилма ёқилғиларни харид қилиши керак", — деди АҚШ энергетика вазири.
Райтнинг фикрича, бу Европа учун иқтисодий жиҳатдан фойдали бўлади. Унга кўра, Европанинг Россия ёқилғисини сотиб олишни тўхтатиши Путиннинг “ҳарбий машинаси”ни молиялаштиришни қисқартиради ва шу орқали урушнинг тугашини тезлаштиради.
Financial Times'нинг ёзишича, 2024 йилда Европа Иттифоқи томонидан импорт қилинадиган қазилма ёқилғиларнинг 14 фоизини Россия гази ташкил этган. Украинага кенг кўламли босқин бошланган 2022 йил февралида эса бу кўрсаткич 40 фоизга тенг бўлган.
Брюссел 2028 йилга бориб Россия нефти ва газидан тўлиқ воз кечишни режалаштирган, бироқ Россиядан ёқилғи оладиган Венгрия ва Словакия бу режага қарши чиқмоқда.
