Европадаги энг катта қочқинлар лагерида ёнғин чиқди

9 сентябрга ўтар кечаси Грециянинг Лесбос оролида жойлашган “Мория” қочқинлар лагерида ёнғин келиб чиқди. У нафақат Греция, балки Европадаги энг йирик лагер ҳисобланар эди. 

“Мория” 2800 кишига мўлжалланган, бироқ грек ҳукумати маълумотига кўра, бу ерда 12600 киши яшаётган эди. Лагерда яшаш шароитининг оғирлиги ва хавфсизлик билан боғлиқ вазият яхши эмаслиги авваллари кўп бора айтилган. 

Лагердаги ёнғин кеча кечқурун юз берган тартибсизликлардан сўнг бошланган. Ўтган ҳафтада қочқинлардан бирида коронавирус аниқлангач, лагер карантинга олинган ва ёпиб қўйилган эди, бошқа қочқинлар эса унга норозилик билдирган. 

Хабарларга кўра, ўт ўчирувчилар “Мория” лагери буткул ёниб кетганини маълум қилган. Ҳеч ким ҳалок бўлмаган ва яраламанмаган, бир неча киши тутундан енгил заҳарланган, дейилмоқда. 

Бошқа манбада эса бир киши вафот этганини, 17 киши касалхонага ётқизилганини айтмоқда.

Ёнғин ҳатто лагер ташқарисига ҳам ўтган ва Лесбос оролида фавқулодда ҳолат жорий этилган. Европа Иттифоқи мутасаддилари энди қочқинларги қаерга жойлаштириш ҳақида бош қотиряпти.  

Лагерга қочқинларнинг ўзи ўт қўйдими ёки маҳаллий аҳолими, ҳозирча номаълум.