Европа Иттифоқининг еттита давлати Украина учун снарядларга буюртма берди. Бу ҳақда Reuters хабар берди.
Ахборот агентлигининг ёзишича, Европа Иттифоқининг еттита мамлакати Ғарб томонидан Украинага етказиб берилган гаубицалар учун 155 мм ўлчамли артиллерия снарядларига буюртма берган. Снарядлар Киевга топширилган Германиянинг Panzerhaubitze 2000, Франциянинг Caesar, Полшанинг Krab ва Словакиянинг Zuzana гаубицалари учун мўлжалланган.
Европа давлатлари номи ошкор этилмаган пудратчилар билан Европа Мудофаа Агентлиги орқали ушбу снарядларни сотиб олиш бўйича шартномалар имзоладилар.
Reuters'нинг қўшимча қилишича, буюртмалар Европа Иттифоқининг Украинага бир йил ичида миллионлаб артиллерия снарядлари ва ракеталарини етказиб бериш бўйича март ойида бошлаган глобал режасининг бир қисмидир. Режанинг умумий қиймати камида 2 миллиард еврога баҳоланмоқда.
