Европа етакчилари Украинага оид тинчлик келишувини муҳокама қилишда Европанинг ҳам иштирок этиши тарафдори эканликларини билдиришди

"Менимча, бизга тўрт томонлама, яъни Украина-АҚШ-Европа-Россия шакиладиги учрашув керак бўлади, чунки хавфсизлик кафолатлари ҳақида гапирганда, биз бутун Европа қитъасининг хавфсизлиги ҳақида гапирамиз", — деди Франция президенти Эммануэл Макрон.

Италия бош вазири Жоржа Мелони “энг аввало” Украина учун хавфсизлик кафолатлари муҳокама қилиниши зарурлигини таъкидлади. Мелони Украина учун NATO шартномасининг бешинчи моддасининг муқобилини мумкин бўлган кафолатлар мажмуаси сифатида қўллаб-қувватлади.

Еврокомиссия раиси Урсула фон дер Ляйен Вашингтон ва Брюссел “тарихдаги энг йирик савдо келишувини” имзолаганини эслатиб, Қўшма Штатларни Россия томонидан босиб олинган ҳудудларидаги украиналик болаларни Украинага қайтаришга кўмаклашишга чақирди.

Трампнинг ўзи эса тинчлик келишувига эришилиши мумкинлигини айтди, аммо бу борада яқин орада аниқлик киритилишини кутаётганини билдирди. "Бир-икки ҳафта ичида биз бу муаммони ҳал қила оламизми ёки бу даҳшатли жанглар давом этадими, аниқ билиб оламиз", — деди АҚШ президенти.

Германия канцлери Фридрих Мерц “Россия билан жиддий музокаралар” фақат Украинада ўт очишни тўхтатгандан кейин бошланиши мумкинлигини, бунинг учун эса Россияга босим ўтказиш лозимлигини таъкидлади. Трамп эса бунга жавобан, “биз тахминан олтита урушни тўхтатдик, уларда ўт очишни тўхтатиш талаб қилинмаган” — деди.

Оммавий ахборот воситалари иштирокидаги суҳбатдан сўнг сиёсатчилар ёпиқ музокара ўтказишди, у қарийб икки соат давом этди.