Ота-она меҳридан маҳрум бўлиб улғайган бола вояга етгач, жамиятда ўз ўрнини топиши учун унга керак бўладигани етарли таълим, касб-ҳунар ва иш билан таъминланишдир. Аммо, яна бир муҳим жиҳат борки, бу давлатнинг алоҳида ресурсларини ҳамда ўта шаффоф ва адолатли тизим бўлишини талаб қилади.
Гап етим ва ота-она қарамоғисиз қолган болаларга уй-жой бериш тизими ҳақида бормоқда.
Куни кеча бўлиб ўтган селекторда Президент Шавкат Мирзиёев ушбу масалага атрофлича тўхталиб, бир қатор топшириқлар берди ва тизим тубдан қайта кўриб чиқилишини айтди.
Бунда:
✔️ “Инсон” марказлари томонидан ҳақиқатда уй-жойга муҳтож ёшлар рўйхати шакллантирилади;
✔️ уларга бериладиган уй-жойнинг нархи бозор баҳосидан келиб чиқиб, ҳудудлар кесимида белгиланади.
Ҳозирда ҳудудидан қатъи назар, 1 хонали (25 квадрат метр) уй учун 132 миллион сўм ажратилаяпти. Лекин, бу нархга уй-жой деярли йўқ.
Шундан келиб чиқиб, жорий йилда бу мақсадлар учун ажратиладиган маблағлар 140 миллиард сўмга етказилади (ўтган йили вилоятларга 72 миллиард сўм берилган).
Вилоят ҳокимлари 1 июнга қадар навбатда турган 500 нафар етим болаларни уй-жой билан таъминлашга шахсан масъул этиб белгиланди.
Бунда, ҳокимлар – етим болалар учун уй-жой топиш ва уларни жойлаштиришга, Ижтимоий ҳимоя агентлиги эса, уй-жой сотиб олишни молиялаштиришга масъул бўлади.
Ушбу масала ота-онасиз улғайган, энди эса яшашга жойи бўлмаган ёшлар учун энг долзарб муаммога айланган. Шу сабабли, уни асло ортга суриш мумкин эмас.