Эронда бир неча кундан бери давом этаётган норозилик намойишларида камида 35 киши ҳалок бўлди

Эронда бир неча кундан бери давом этаётган норозилик намойишларида камида 35 киши ҳалок бўлди, 1200 дан ортиқ одам ҳибсга олинди — DW.

Нашр бу ҳақда Human Rights Activists in Iran инсон ҳуқуқлари ташкилотига таяниб хабар берди.

Ташкилот маълумотларига кўра, 28 декабр куни бошланган норозилик намойишлари мамлакатдаги 31 вилоятнинг 27 тасида, камида 88 шаҳарда бўлиб ўтган. Ҳуқуқ ҳимоячиларининг ёзишича, баъзан Эрон хавфсизлик кучлари намойишчиларга қарши куч ишлатган.

Бундай ҳаракатлар йирик шаҳарларда, жумладан Машҳад ва Эрон пойтахти Теҳронда норозиликларнинг янги тўлқинини келтириб чиқарган. Намойишларга мамлакат бўйлаб камида 17 та олий ўқув юртининг талабалари қўшилган. Маҳаллий оммавий ахборот воситаларига кўра, бунга жавобан куч тузилмалари университет бинолари ҳудудларида рейдлар ўтказа бошлаган.

Ҳуқуқ ҳимоячилари маълумотига кўра, Эрондаги оммавий норозиликлар чоғида ҳалок бўлган 35 кишининг 29 нафари намойишчилар, тўрт нафари болалар, яна икки нафари эса хавфсизлик кучлари ходимлари ҳисобланади.

Эронда бошланган намойишлар 2022 йилдан бери мамлакатдаги энг йирик оммавий намойишлар бўлди. Ўшанда норозиликларга 22 ёшли Маҳса Аминийнинг “ахлоқ полицияси” томонидан қўлга олинганидан кейин вафот этгани сабаб бўлган эди.