Эрон ҳукуматга қарши намойишларни қўллаган компаниялар ва бизнеслар мулкини мусодара қилмоқда

Эрон ҳукуматга қарши намойишларни қўллаган компаниялар ва бизнеслар мулкини мусодара қилмоқда — Financial Times.

Эрон Бош прокуратураси 20 дан ортиқ спортчилар, актёрлар ва киноижодкорларга нисбатан намойишларга ундаш бўйича иш қўзғатилганини маълум қилди. Идорага кўра, уларнинг мол-мулки норозилик намойишларидан кўрилган зарарни қоплаш учун йўналтирилади.

Бундан ташқари, 60 га яқин кафе “террорчилик актлари”ни бевосита ёки билвосита қўллаб-қувватлагани аниқланган. Эрондаги Tasnim ахборот агентлигинино ёзишича, мамлакатда машҳур бўлган қаҳвахоналар тармоғи ва савдо маркази эгаси Муҳаммад Сайдини ҳибсга олинган, унинг мулки эса мусодара қилинган.

Эрон расмийлари ислоҳотчиларнинг Ham-Mihan газетасини давлат шифохоналарининг намойишлар вақтидаги фаолиятини ёритгани туфайли ёпган. Бундан ташқари, яна бир ахборот агентлиги ва янгиликлар портали ёлғон ахборот тарқатишда айбланган, уларнинг номларига аниқлик киритилмаган.

2025 йил декабр ойи охирида Эронда ҳукуматга қарши кенг кўламли намойишлар бошланди. Хориждаги эронлик ҳуқуқ ҳимоячиларининг HRANA ташкилоти маълумотига кўра, Эронда намойишлар шафқатсизлик билан бостирилиши оқибатида уч мингдан ортиқ киши ҳалок бўлган. Бошқа ҳуқуқ ташкилотлари эса қурбонлар сонини беш мингдан ортиққа баҳолаган. Эронда интернет блоклангани туфайли ишончли маълумот олишнинг имкони бўлмаяпти.