Эрон билан уруш америкаликларнинг озиқ-овқат харид қилиш одатларини ўзгартирмоқда

Яқин Шарқдаги можаронинг янги босқичи АҚШда озиқ-овқат нархларининг янада ўсишига туртки берди. Бу эса америкаликларни чегирмалар излашга, харид одатларини ўзгартиришга ва озиқ-овқат харажатларини қисқартиришга мажбур қилмоқда.

Associated Press маълумотига кўра, Яқин Шарқдаги можаронинг янги босқичи АҚШда озиқ-овқат нархларининг янада ошиб кетишига олиб келган. Натижада мамлакат аҳолиси озиқ-овқат харид қилиш одатларини ўзгартирмоқда. Америкаликлар тобора кўпроқ чегирмалар изламоқда, турли дўконлардаги нархларни таққосламоқда, арзонроқ маҳсулотларга ўтмоқда ва аввал мунтазам сотиб олган айрим маҳсулотлардан воз кечмоқда.

Агентлик маълумотига кўра, 2019 йил бошидан буён АҚШ шаҳарларида озиқ-овқат маҳсулотлари нархи 33 фоизга ошган. Бу қарийб ярим аср ичидаги энг катта ўсиш ҳисобланади. Нархларнинг кўтарилиши пандемия оқибатлари, таъминот занжирларидаги узилишлар, табиий офатлар, савдо божлари, Россия–Украина можароси ҳамда Яқин Шарқдаги янги кескинлашув каби бир қатор омиллар билан изоҳланмоқда.

Associated Press таъкидлашича, айнан Яқин Шарқдаги янги можаро жорий йилда озиқ-овқат инфляциясини янада тезлаштирган. Шу сабабли маҳсулотлар нархининг ошиб бориши америкаликлар учун энг муҳим иқтисодий муаммолардан бирига айланиб, кузда бўлиб ўтадиган оралиқ сайловлар олдидан асосий сиёсий мавзулардан бири бўлиб қолмоқда.

Таҳлилчиларнинг сўзларига кўра, кўплаб оилалар тежамкорликнинг ўз усулларини ишлаб чиққан. Харидорлар олдиндан акцияларни ўрганмоқда, купонлардан фойдаланмоқда, арзонроқ брендларни танламоқда, гўшт ва бошқа қиммат маҳсулотларни камроқ сотиб олмоқда, шунингдек, мажбурий бўлмаган харажатларни қисқартирмоқда.

Шу билан бирга, иш ҳақлари ошганига қарамай, кўплаб АҚШ аҳолиси молиявий босимни ҳануз ҳис қилмоқда. Материалда қайд этилишича, уй-жой, электр энергияси ва бошқа кундалик эҳтиёжлар учун сарф-харажатлар ҳам сезиларли даражада кўпайгани боис, даромадларнинг ўсиши кўпчилик учун озиқ-овқат нархининг қимматлашувини қоплай олмаяпти.

Агентлик озиқ-овқат инфляциясининг янги тўлқинига сабаб бўлган омиллардан бири сифатида Эрон билан боғлиқ урушни ҳам келтиради. Можаро оқибатида ёқилғи нархлари ошиб, энергетика бозорларидаги беқарорлик кучайган. Бу эса юк ташиш ва маҳсулот етказиб бериш харажатларини оширган. Айниқса, денгиз логистикасига боғлиқ ҳудудларда, жумладан Гавайида, етказиб бериш қийматининг ошиши маҳаллий ишлаб чиқарилган маҳсулотлар нархининг янада кўтарилишига олиб келган.