Эрон АҚШга Ҳормуз бўғозини очиш шартларини тақдим этди

Эрон воситачилар орқали АҚШга Ҳормуз бўғозини очиш шартларини етказди.

Бу ҳақда Эрон Олий Раҳбарининг янги ҳарбий маслаҳатчиси Моҳсен Ризоий маълум қилди.

Унинг таъкидлашича, Теҳрон ҳарбий ҳаракатларни тўхтатишни, Эрон активларини озод қилишни ва минтақада, жумладан, Ливан ва Ғазо секторида урушларга чек қўйишни талаб қилмоқда.

"АҚШ ўз хатти-ҳаракатларини ўзгартирмагунча ва Эроннинг шартларини қабул қилмагунча, бўғоз очилмайди", деди Ризоий.

У шунингдек, Эрон ва Уммон ўртасидаги Ҳормуз бўғози бўйича келишув унинг очилишига таъсир қилмаслигини таъкидлади.