Бу ҳақда Politico нашри маълум қилди.
Хабар берилишича, АҚШ Конгрессининг Республикачилар назоратидаги Вакиллар палатаси назорат қўмитаси Эпштейн билан боғлиқ 20 мингдан ортиқ ҳужжатни эълон қилган.
"Америкалик молиячи, одам савдоси ва вояга етмаганларга нисбатан жинсий эксплуатацияда айбланган Жеффри Эпштейн Россия дипломатлари билан алоқалар ўрнатиш масаласини муҳокама қилган. У 2018 йилда Доналд Трампнинг Владимир Путин билан учрашуви арафасида Москвага АҚШ президенти ҳақида “тасаввурга эга бўлиш имконини берувчи” маълумотларни таклиф қилган", деб ёзади нашр.
Politico Эпштейннинг Норвегия собиқ бош вазири Турбёрн Ягланд билан ёзишмаларини келтирган. Ўша пайтда Ягланд Европа Кенгашига раҳбарлик қилган.
"Менимча, сиз Путин Трамп ҳақида тасаввур ҳосил қилиши учун Лавровга мен билан суҳбатлашишни таклиф қилишингиз мумкин”, — деб ёзган Эпштейн.
Ягланд ўз жавобида эртаси куни Лавровнинг ёрдамчиси билан учрашишини ва унга Эпштейн билан боғланишни таклиф қилишини билдирган. Кейинчалик томонлар ўртасида алоқалар бўлганми ёки йўқми номаълум.
Бошқа мактублардан маълум бўлишича, Эпштейн Россиянинг БМТдаги собиқ доимий вакили Виталий Чуркин билан ҳам мулоқот қилган.
"Чуркин ажойиб инсон. У Трампни бизнинг суҳбатларимиздан кейин яхшироқ тушунди. Бу унчалик қийин эмас", — деб ёзган у.
