Энг кўп қоидабузарликлар содир этиладиган автомобиллар рейтинги тузилди

АҚШда автомобиль суғурта компанияларини танлаш имконини берувчи Insurify портали йўл ҳаракати қоидаларини энг кўп қўпол равишда бузадиган автомобиллар рейтингини тузиб чиқди.

Рейтингни тузишда йўл ҳаракати қоидаларини бузиш юзасидан суғурта компанияларига келган 2,5 миллион дона ариза маълумотларидан фойдаланилган. Ушбу маълумотлар АҚШда содир бўлган авариялар, қоида бузиш ҳолатлари ва жарима чекларини ўз ичига олади.

Сўнгги 10-ўринни Audi A4 автомобили эгаллаган: ушбу автомобиль ҳайдовчилари пиёдаларни 4 маротаба камроқ ўтказиб юборишган. 9-ўринда – бошқа автомобилларга йўл бермаслиги оқибатида кўп ЙТҲларга сабаб бўлган HondaElement жой олди. 8-ўринда – бошқа йўл ҳаракатининг бошқа иштирокчилари устуворлигига эътибор қилмайдиган ва кўпинча тезликни оширадиган Hyundai Velostar жой олган.

7- ва 6-ўринлардан Acura’нинг ILX ва TLX моделлари жой олган. Улар 81 фоиз ҳолатда бошқаларга йўл бермаган, 72 фоиз ҳолатда эса тўхташ белгисига амал қилмаган.

Кучли бешталикни ўртача ҳолатлардан икки баробар кўп хавфсизлик камари тақилмайдиган Toyota Celica автомобили очиб бермоқда. 4-ўринда одатдагидан кўра икки баробар кўпроқ қувиб ўтиш қоидаси бузилган Subaru WRX автомобили жой олди.

3-ўринни эса бошқалардан кўра 1,5 маротаба кўпроқ қизил чироқда ўтиб кетган Audi А5 эгаллаган. Иккинчи ўринда барча қоидабузарликларни икки баробар кўпроқ қайд этган BMW 7-Series жой олган бўлса, пиёдаларга йўл беришни хушламайдиган ва светофорнинг қизил чироғини «менсимайдиган» BMW 4-Series ҳайдовчилари биринчиликдан жой олган.