Ижтимоий тармоқларда 28 июль куни Тошкентдаги «Анҳор» паркида осмондан ленталар ёғилиши ҳақида видео тарқалди.
Тошкент шаҳар Экология, атроф-муҳитни муҳофаза қилиш ва иқлим ўзгариши бошқармаси томонидан ҳолат ўрганилди. Ўрганиш натижасида паркдаги «Амфитеатр»да «лента-шоу» уюштирилиши, бунда аниматорлар томонидан ленталарни айлантириб, томоша кўрсатилиши, «осмондан ленталар ёғилиши» эса эътиборни жалб қилиш учун айтилганлиги маълум бўлди.
Байрам ташкилотчиларига бу каби шоулар атроф-муҳитнинг ифлосланишига сабаб бўлиши, экология учун зарарли эканлиги тушунтирилди. Натижада шу куни ўтказилиши режалаштирилган «лента-шоу» бекор қилинди. Қолаверса, блогерлар томонидан тарқатилган видеолар ўчирилди.
Экология вазирлиги хиёбонлар, дам олиш масканлари, кўнгилочар объектлар мутасаддиларини юқоридаги каби атроф-муҳитга зарар келтирадиган шоулар ўтказмасликка чақиради. Унутманг, экологияга етказилган ҳар қандай зарар учун қонунда қатъий жазо белгиланган.