Дунёнинг энг қудратли наркобаронларидан бири АҚШда қўлга олинди

Дунёнинг энг қудратли наркобаронларидан бири, Мексиканинг “Синалоа” картели раҳбари, “Эл Маё” лақаби билан танилган Исмаэл Замбада АҚШда қўлга олинди

АҚШ Адлия вазирлигининг хабар беришича, Замбада 25 июл куни АҚШ федерал агентлари томонидан Техас штатининг Эль-Пасо шаҳрида ҳибсга олинган.

76 ёшли Замбада билан бирга жиноий ташкилот асосчиларидан бири, ҳозирда АҚШ қамоқхонасида ўтирган Хоакин “Эл Чапо” Гусманнинг ўғли Хоакин Гусман Лопес ҳам ҳибсга олинган. The Wall Street Journal газетаси наркобаронларнинг қўлга олиниши борасида ёзар экан, Замбада ички хавфсизлик бўйича тергов ва Федерал қидирув бюросининг бир неча ой давом этган операциясидан сўнг, “Синалоа”нинг юқори мартабали аъзоси томонидан самолётга алдаб чиқарилганини баён қилди. Америка нашрлари ушбу операция Оқ уй раҳбари Жо Байден маъмурияти даврида амалга оширилган энг катта операциялардан бири эканлигини ёзмоқда.

BBC эса Замбада жорий йилнинг феврал ойида АҚШ прокуратураси томонидан героиндан кучлироқ дори бўлган фентанилни ишлаб чиқариш ва тарқатишдс айбланганини ёзди.