Демократлар Хегсетни импичмент қилиш тўғрисидаги резолюцияни тақдим этмоқчи

Демократлар Ҳегсетни импичмент қилиш тўғрисидаги резолюцияни тақдим этиш ниятида, деб хабар беради Axios манбаларга таяниб.

"Вакиллар палатасидаги демократлар уруш вазири Пит Хегсетни ҳокимиятни суиистеъмол қилиш, ҳарбий жиноятлар ва бошқа жиддий ҳуқуқбузарликларда айблаб, унга импичмент эълон қилиш бўйича олтита моддани кўриб чиқиш учун тақдим этади," - дейилади хабарда.

Пентагон раҳбари олтита бандда айбланмоқда:

- Эронга қарши ноқонуний уруш бошлаш;
- Тинч аҳолига қарши ҳужумлар;
- Махфий маълумотларга бепарволик қилиш;
- Конгресс назоратига тўсқинлик қилиш;
- Ҳокимиятни суиистеъмол қилиш ва ҳарбий куч ишлатишни сиёсийлаштириш;
- Қўшма Штатлар ва унинг қуролли кучларининг обрўсига путур етказадиган ҳаракатлар.

Қайд этилишича, резолюция АҚШнинг Эрондаги ҳаракатлари, "Сигналгейт" ва Хегсетга тегишли бўлган бошқа қонунбузарликларга бағишланган.

Биринчи навбатда, америкалик демократлар АҚШ Пентагони раҳбарини "Эронга қарши рухсатсиз уруш"да айбламоқда, бу эса Америка ҳарбийларини хавф остига қўймоқда. Хусусан, партия маълумотларига кўра, операция АҚШ Конгрессининг олдиндан розилигисиз бошланган. Демократлар, шунингдек, уруш қонунларининг бузилиши ва Эроннинг тинч аҳолисига ҳужумга эътибор қаратди.