Дам олиш марказига кирган айиқ ўлдирилди

Иркутск вилоятидаги дам олиш марказига кирган айиқни полиция ходими ўлдирди.

Бу ҳақда Иркутск вилояти Ички ишлар вазирлигининг Бош бошқармаси хабар берди.

Бўлим маълумотларига кўра, айиқ чоршанба куни Уст-Илимск шаҳри ва Железнодорожний қишлоғи ўртасида жойлашган дам олиш марказига кирган.

Ҳайвон ҳақида хабар берилгандан сўнг, воқеа жойига полиция ходимлари ва тегишли бўлим инспектори юборилган.

"Полиция тўғрисидаги қонунга мувофиқ, йўл ҳаракати полицияси ходими ўзининг хизмат автомат қуролидан фойдаланиб, фуқароларнинг ҳаёти ва соғлиғига таҳдид солаётган йиртқични зарарсизлантирди. Ҳодиса натижасида айиқ ўлдирилди ва ҳеч ким жароҳат олмади", дейилади баёнотда.

Бу йил Иркутск вилоятида бешта айиқ билан тўқнашув қайд этилган.