CNN Хитойнинг Эронга яширин қурол етказиб бериш режаси ҳақида хабар берди

Хитой яқин ҳафталар ичида Эронга ҳаво ҳужумидан мудофаанинг янги тизимларини, жумладан, кўчма зенит-ракета мажмуаларини (КЗРМ) етказиб беришни режалаштирмоқда. Бу ҳақда CNN телеканали учта манбага таяниб хабар бермоқда.

Телеканалнинг эслатишича, ушбу кўчма мажмуалар АҚШнинг паст баландликда учадиган ҳарбий самолётлари учун жиддий хавф туғдириши мумкин.

Иккита манбанинг сўзларига кўра, разведка маълумотлари гўёки Пекин юкларнинг асл келиб чиқишини яшириш учун уларни учинчи давлатлар орқали йўналтиришни режалаштираётганини кўрсатмоқда.

«Пекиннинг Эрон ва АҚШ ўртасидаги нозик ўт очишни тўхтатиш келишувида воситачилик қилгани ҳақидаги баёнотлари фонида, бу қадам провокацион ҳаракат бўлган бўларди», — деб қайд этади телеканал.

Шу билан бирга, Хитойнинг Вашингтондаги элчихонаси вакили бу айбловларни кескин рад этиб, ушбу маълумотлар ҳақиқатга тўғри келмаслигини таъкидлади.

«Биз Америка томонини асоссиз айбловлардан, ғаразли уйдирмалар ва шов-шувлардан тийилишга чақирамиз», — деди у телеканал сўровига жавобан.