CNN, MS NOW ва Politico журналистларига Оқ уйга кириш қайта тикланди

АҚШ президенти Дональд Трамп маъмурияти CNN, MS NOW ва Politico журналистларининг Оқ уйга кириш ҳуқуқини қайта тиклади.

Аввалроқ, 24 сентябрь куни федерал судья Тимоти Келли маъмуриятга журналистларнинг Оқ уй ҳудудига киришини тиклашни буюрган эди. Бироқ суд қарорига қарамай, ўша куни учта нашр журналистлари киришда яна муаммоларга дуч келган.

Шундан сўнг нашрлар судга мурожаат қилиб, маъмурият суд буйруғини бажармаётганини билдирган. Суд белгиланган муддат ичида маъмуриятдан жавоб беришни талаб қилган.

Муддат тугашига бир соатдан кам вақт қолганда MS NOW журналистларига Оқ уйга киришга рухсат берилган. Кейин CNN ва Politico вакиллари ҳам уларнинг рухсатномалари тикланганини маълум қилган.

Трамп 18 сентябрь куни ушбу учта нашр журналистларининг Оқ уйга киришини чеклаган ва уларни «сохта хабарлар» тарқатишда айблаган эди. Нашрлар маъмурият қарорини сўз ва матбуот эркинлиги кафолатларини бузгани юзасидан судга берган.