«Челси» 2020 йилдан бери футболчи сотишдан 1 млрд фунтдан ортиқ даромад қилди

Лондоннинг «Челси» клуби 2020 йилдан бери футболчиларни сотишдан энг кўп маблағ ишлаган клуб бўлиб турибди.

Transfermarkt маълумотлари асосида тузилган рейтингга кўра, «кўклар» сўнгги йилларда футболчилар трансферидан 1,084 млрд фунт даромад олган. Бу кўрсаткич бўйича «Челси» энг яқин таъқибчиси «Бенфика»ни 327 млн фунтга ортда қолдирмоқда. Рейтингнинг евро ҳисобидаги версиясида Лондон клубининг трансфер даромади қарийб 1,27 млрд еврони ташкил этади.

2020 йилдан бери футболчи сотишдан энг кўп даромад қилган клублар:

1. «Челси» — 1,084 млрд фунт
2. «Бенфика» — 757 млн фунт
3. «РБ Лейпциг» — 706 млн фунт
4. «Аталанта» — 655 млн фунт
5. «Астон Вилла» — 648 млн фунт
6. «Ренн» — 625 млн фунт
7. «Вулверҳэмптон» — 624 млн фунт
8. «Манчестер Сити» — 623 млн фунт
9. «Брайтон» — 606 млн фунт
10. «ПСЖ» — 522 млн фунт

«Челси»нинг бу борадаги юқори кўрсаткичи клубнинг сўнгги йилларда трансфер бозорида нафақат катта маблағ сарфлаётгани, балки футболчиларни юқори нархларда сотишга ҳам муваффақ бўлаётгани билан боғлиқ.

Хусусан, Лондон клуби Кай Хаверцни «Арсенал»га 75 млн евро, Мэйсон Маунтни «Манчестер Юнайтед»га қарийб 68 млн евро, Конор Галлахерни «Атлетико»га 42 млн евро, Ян Матсенни «Астон Вилла»га 44 млн евро атрофида сотган. 2025 йилда Нони Мадуэкенинг «Арсенал»га трансфери ҳам клубга катта маблағ келтирган.

Айни пайтда бу рақамларни соф трансфер фойдаси билан адаштирмаслик керак. Рейтинг клубларнинг футболчиларни сотиш орқали олган умумий тушумига асосланган — уларни аввал харид қилиш учун сарфланган маблағ ҳисобдан чиқарилмаган. Transfermarkt трансфер даромади ва харажатларини алоҳида статистика сифатида юритади.