Хитой автогиганти BYD компанияси Yuan моделининг бюджет варианти Yuan UP электромобили суратларини тақдим этди.
Yuan UP автомобилининг ўлчамлари узунлиги 4310мм, кенглиги 1830мм, баландлиги 1675 мм.ни, ғилдирак ўқлари базаси 2620 мм.ни ташкил этади. Солиштириш учун Tracker ва Hyundai Creta автомобилларидан барча параметрлар бўйича каттароқ бўлади. Кенглиги ва баландлиги бўйича эса Kia Seltosни ҳам ортда қолдиради.
Yuan UP моделига худди BYD Dolphin моделида бўлгани каби қуввати 70 кВт ва 130 кВтлик иккита электр мотор ўрнатилади. Унинг максимал тезлиги 160 км/соатгача бўлади. BYD Yuan UP литий темир фосфатли икки хил батарея билан жиҳозланади. Арзонроқ комплектациясига сиғими 32 кВт/с бўлган, максимал комплектациясига эса сиғими 45,1 кВт/с.лик батарея ўрнатилади. Бу унга тўлиқ қувват билан 401 км.гача (оддий комплектация 301 км) масофа босиб ўтиш имкониятини беради.
Yuan UP электромобили Хитойда 100 минг юандан (14 085 АҚШ доллари) сотувга чиқиши режалаштирилмоқда. Агар шундай бўлса, Ўзбекистонга келгунига қадар унинг нархи тахминан 17-18 минг долларга айланади. Электромобилда панорама том ва люк борлигини (айнан Е2га етишмаган жиҳат) ҳисобга олсак, бундай нарх билан у Ўзбекистонда Tracker савдосини синдиришини тахмин қилиш мумкин.
