Буюк Британия Мудофаа вазирлиги раҳбари Жон Ҳили ҳарбий саноат ва Германия Қуролли кучлари билан ҳамкорликни ўз ичига олган келишувни "улкан миқёсдаги ва муҳим аҳамиятга эга" деб атади.
"Trinity House Agreement номини олган шартнома биринчи навбатда, Европада хавфсизликка эришишга хизмат қилади. Шу билан бирга, Лондон ва Берлинга Россия президенти Владимир Путин томонидан олиб борилаётган “бўлиниш ва вайронагарчилик” сиёсатига қарши бирлашишга имкон беради. Украинадаги уруш Европадаги хавфсизликни оддий масала деб қабул қилмаслигимиз кераклигини кўрсатди", — дея маълум қилди Германия Мудофаа вазири Борис Писториус шартнома имзолангандан кейин Лондонда бўлиб ўтган матбуот анжуманида.
Германия Мудофаа вазирининг аниқлик киритишича, Берлин ва Лондон ўртасидаги келишув янги узоқ масофали қуролларни ишлаб чиқиш, Буюк Британияда Rheinmetall томонидан танклар ишлаб чиқариш, шунингдек, NATO'нинг шарқий чегарасида қўшма машғулотлар ўтказишни назарда тутади.
DPA агентлиги маълумотларига кўра, келишувлар немис разведка самолётларини Шотландияда жойлаштириш ва дронлар томонидан қувватланадиган танк бирликларини яратишни назарда тутади.
