Буюк Британия қироли Чарлз III даволанишнинг ножўя таъсирлари сабабли жума кунги тадбирларни кечиктирди

Букингем саройининг хабар беришича, қирол давом этаётган онкологик даволанишнинг вақтинчалик ножўя таъсирлари туфайли қисқа муддатга касалхонада кузатув остида бўлган. Ҳозирда у Лондондаги Кларенс-ҳаус резиденсиясида.

28 март куни Чарлз III Бирмингемда тўртта оммавий тадбирда иштирок этиши, шунингдек, Бирмингем қироллик балет труппасига ташриф буюриши керак эди. Ундан ташқари, уч нафар хорижий элчи билан учрашувлар ҳам режалаштирилган бўлган.

Эслатиб ўтамиз, Буюк Британия қиролининг онкологик ташхиси ҳақида Букингем саройи илк бор 2024 йил феврал ойида маълум қилган эди. Дастлаб у оммавий тадбирларда иштирок этишни чеклаган, аммо кейинчалик ўзининг одатий иш тартибига деярли тўлиқ қайтган.