Бухорода она вояга етмаган қизининг юз ва қўл қисмини қизиган капгир билан куйдирди

Бухоро вилояти Шофиркон туманида она ўз қизининг юз, қўл ва танасига қизиган капгир босгани айтилган хабар ижтимоий тармоқларга сиздирилди. Ушбу ҳолат юзасидан Болалар омбудсмани муносабат билдирди.

Аниқланишича, олиб борилган терговга қадар текширув давомида М.Ж. (аёл) жорий йилнинг 25 октябрь куни уйининг ошхонасида 2015 йилда туғилган қизи Б.А.нинг қўллари ва юз қисмига қизиган ошхона темир "капгир"ни босиб, Б.А.га тан жароҳати етказган.

Вояга етмаган қизга нисбатан судга оид тиббий экспертиза тайинланган. Ҳозирда вояга етмаган Б.А. туман тиббиёт бирлашмасига ётқизилиб, унга шифокорлар томонидан зарурий тиббий хизмат кўрсатилмоқда.

"Ҳолат юзасидан Шофиркон туман ИИБ ҳузуридаги ТГ томонидан М.Ж.га нисбатан ЖКнинг 126-1-моддаси 3-қисми (оилавий (маиший) зўравонлик) билан жиноят иши қўзғатилди. Ҳозирда тергов ҳаракатлари олиб борилмоқда. Бу борада қўшимча маълумот берилади," - дейилади хабарда.