Еврокомиссия ва Ғарбий Болқон давлатлари ўртасида ҳайдовчиларнинг ЕИга кириш-чиқиш тизими билан боғлиқ муаммоларини ҳал этиш бўйича тузилган ишчи гуруҳ муҳокамалари давом этмоқда. Навбатдаги учрашув 23 февралга белгиланган.
ЕИ расмий вакили Гийом Мерсье Брюсселдаги матбуот анжуманида Ғарбий Болқон давлатларига узоқ муддатли визалар, яшаш рухсатномалари ёки Шенген ҳудудидаги трансчегаравий ишчиларга оид қоидалардан фойдаланиш тавсия этилганини билдирди.
Бироқ транспорт компаниялари уюшмалари музокаралардан норози эканини маълум қилди. Уларнинг айтишича, Еврокомиссия таклиф этилган ечимларни рад этган ва шу боис улар чегара ўтиш пунктларида блокадалар уюштириб, норозиликларни давом эттириш ҳуқуқини сақлаб қолмоқда.
Янги кириш-чиқиш тизимидан авиакомпаниялар ва аэропортлар уюшмалари ҳам норози. Уларга кўра, тизим ташқи Шенген ҳудудидан келувчи сайёҳлар учун узун навбатларни юзага келтирмоқда. Қизғин мавсумда кутилган вақт 4 соатгача чўзилиши мумкинлиги айтилган.
Мерсьенинг сўзларига кўра, ўтган йил октябридан босқичма-босқич жорий этилаётган тизим тўлиқ апрел ойида ишга туширилиши режалаштирилган. Ҳозирга қадар 25 миллиондан ортиқ кириш-чиқиш ҳолати рўйхатга олинган ва қарийб 15 минг ҳолатда кириш рад этилган. Айрим давлатларда техник муаммолар аниқлангани ва улар бартараф этилаётгани билдирилди.
Имомали Раҳмон вафот этди(ми)?
Олим Ер аҳолисини «жаҳаннам иқлими»дан огоҳлантирди
Ер юзидаги совуқлик рекорди қайд этилди
