Boeing авиаҳалокатда ҳалок бўлган БМТ ходими учун 28 миллион доллардан кўпроқ тўлайдиган бўлди

Чикаго федерал суди ҳакамлар ҳайъати Boeing компаниясига 2019 йилда Эфиопияда Boeing 737 MAX ҳалокатида ҳалок бўлган Бирлашган Миллатлар Ташкилотининг атроф-муҳит бўйича ходими Шикха Гаржнинг оиласига 28 миллион доллардан кўпроқ пул тўлашга мажбур қилди.

Бу ҳақда Reuters агентлиги хабар берди.

Фоизларни ҳисобга олган ҳолда унинг оиласи 35,85 миллион доллар олади, деб ёзади агентлик.

Даъво аризасида 737 МАХ самолёти дизайнида нуқсонлар борлиги ва Boeing йўловчилар ва аҳолини хавф ҳақида огоҳлантирмагани айтилган. Оиланинг адвокатларига иқтибос келтирган ҳолда, ҳукм "Boeingнинг ноқонуний хатти-ҳаракатлари учун жамоатчилик олдида жавобгарликни таъминлайди". Улар, шунингдек, Boeing шикоят қилмаслигини таъкидладилар.

Эфиопиянинг Аддис-Абеба шаҳридан Кения пойтахти Найробига йўл олган Ethiopian Airlines авиакомпаниясининг 302-рейси ҳавога кўтарилганидан бир неча дақиқа ўтиб ҳалокатга учради. Бундан беш ой олдин Lion Air авиакомпаниясининг самолёти Индонезия яқинида Ява денгизига қулаган эди. Ушбу офатларда жами 346 киши ҳалок бўлган. Ҳар иккала ҳалокатга ҳам авиакомпаниянинг парвозларни бошқаришнинг автоматлаштирилган тизими сабаб бўлган.

Бу икки самолёт ҳалокатидан кейин қўзғатилган ўнлаб даъволарнинг биринчиси. Агентлик маълумотларига кўра, компания авариялар билан боғлиқ даъволарнинг 90 фоиздан ортиғини қондириб, миллиардлаб доллар товон тўлаган.