Бизнес-самолёт ҳалокатга учраганидан кейин Лондондаги аэропорт фаолияти тўхтатилди

Лондоннинг Эссекс шаҳридаги Саутенд аэропорти 13 июль куни кичик самолёт ҳалокатга учрагач, ўз фаолиятини тўхтатди.

Бу ҳақда Reuters агентлиги аэропортга таяниб хабар бермоқда.

"Аэропортга борадиган ва қайтаётган барча рейслар бекор қилинди, полиция, фавқулодда хизматлар ва авиаҳалокат терговчилари воқеани тергов қилмоқда”, — дейилади хабарда.

Аввал хабар қилинганидек, Beechcraft King Air B200 бизнес-самоёлти якшанба куни тушдан кейин Саутенд аэропортида ҳалокатга учради.

Қайд этилишича, самолёт ҳавога кўтарилганидан сўнг дарҳол портлаб, “оловли шар”га айланган. Қурбонлар сонига аниқлик киритилмоқда.