Аргентина устози ЖЧ-2026да футболчиларнинг ҳолати муаммо бўлганини айтди

Аргентина терма жамоаси бош мураббийи Лионель Скалони якунланган 2026 йилги Жаҳон чемпионатида жамоа дуч келган муаммолар ҳақида гапирди.

Аргентиналиклар плей-оффнинг ҳар бир босқичини катта қийинчилик билан босиб ўтиб, финалгача етиб борган эди.

«Қатардаги 2022 йилги Жаҳон чемпионатига биз анча яхшироқ тайёр эдик — футболчиларнинг 95 фоизи мусобақага яхши ҳолатда келганди. Бу сафар эса биз деярли имкониятларимиз чегарасида эдик.

Мен мураббийлик ишининг бошқа томонини ҳам кўрдим. Футболчиларнинг ҳеч бири ўзини 100 фоиз тайёр ҳис қилмасди, аммо биз уларга ишондик. 2022 йилга қараганда анча мураккаб қарорлар қабул қилишимизга тўғри келди», — дея Скалони сўзларини All About Argentina келтирмоқда.

Финалда Аргентина қўшимча вақтдан кейин Испания терма жамоасига 0:1 ҳисобида мағлуб бўлди.