Аргентина Буюк Британияни Фолкленд ороллари масаласида халқаро трибуналга бериш билан таҳдид қилди

Аргентина президенти Ҳавер Милей Буюк Британияга Фолкленд ороллари яқинидаги нефт конларини ўзлаштириш лойиҳасини тўхтатиш учун икки ҳафта вақт берди. Унинг айтишича, акс ҳолда, Буенос-Айрес халқаро трибуналга мурожаат қилади.

Мазкур нефт лойиҳаси Фолкленд ороллари иқтисодиётини тубдан ўзгартириши мумкин. Бироқ бу ҳолат икки давлат ўртасидаги узоқ йиллик суверенитет можаросини янада кучайтирмоқда. Таъкидланишича, агар Буюк Британия икки ҳафта ичида Sea Lion лойиҳасини тўхтатмаса, Аргентина Гамбургдаги денгиз масалалари бўйича халқаро трибуналга арбитраж жараёнини бошлаш учун мурожаат қилади.

Аргентинанинг президентининг билдиришича, Буюк Британия томонидан нефт қидириш ишларига рухсат этилиши БМТ резолюциясини бузади. Бу резолюция томонларни Фолкленд ороллари суверенитети бўйича баҳс ҳал этилмагунча бир томонлама ҳаракатлардан тийилишга чақиради.

Шунингдек, Милей Фолкленд ороллари атрофида нефт қидириш ишларида қатнашаётган компанияларни Аргентинанинг нефт ва кончилик секторида ишлашини тақиқлаш билан таҳдид қилди. У олдин ҳам бу нефт компанияларига санкция киритиш билан таҳдид қилганди.

Бундан ташқари, Аргентина ҳукумати Буенос-Айреснинг рухсатисиз ороллар атрофида ресурсларни қазиб олганлик учун 20 йилгача озодликдан маҳрум қилиш жазосини назарда тутувчи қонун лойиҳасини парламентга юборди. Аргентина расмийлари ҳозирда камида 60 та компания ва уларнинг раҳбарларини эҳтимолий қоидабузарликлар бўйича текшираётганини маълум қилди.

Sea Lion (Денгиз шери) — Фолкленд оролларидан тахминан 220 километр шимолда жойлашган йирик денгиз нефт кони ҳисобланади. Нефт қазиб олиш ишларини 2028 йилда бошлаш режалаштирилган. Унда иштирок этаётган компаниялар Аргентинанинг эътирозларини рад этиб, улар лойиҳа учун қонуний лицензияларга эга эканини таъкидламоқда. Буюк Британия ҳам орол аҳолисининг ўз табиий ресурсларини ривожлантириш ҳуқуқини ҳимоя қилмоқда.