АҚШ президенти Дональд Трампнинг рафиқаси Мелания Трамп маълум қилишича, Россия-Украина уруши сабабли уйини ташлаб чиқишга мажбур бўлган саккиз нафар бола Россия президенти Владимир Путин билан бўлиб ўтган музокаралардан сўнг ўз оилаларига қайтарилган.
Биринчи хониманинг сўзларига кўра, Путин август ойида Аляскада бўлиб ўтган икки раҳбарнинг учрашуви чоғида Дональд Трамп орқали юборилган тинчликка даъват этувчи мактубга ёзма жавоб берган.
Мелания Трамп Оқ уйда сўзлаган нутқида айтишича, мазкур мактубдан сўнг можаро оқибатида уйсиз қолган болалар масаласи бўйича икки давлат ўртасида очиқ мулоқот канали ташкил этилган.
У таъкидлаганидек, сўнгги уч ой давомида ҳар икки томон бир неча маротаба ҳамдардлик руҳида учрашувлар ўтказган ва унинг вакилларидан бири болаларнинг оилалари билан бирлашишини таъминлаш учун Путин жамоаси билан тўғридан-тўғри ҳамкорлик қилган.
Мелания Трампнинг маълумот беришича, сўнгги 24 соат ичида саккиз нафар бола ўз оилалари билан қайта учрашган, ва бу жараён давом эттирилади.
