АҚШда Трамп сиёсатига қарши намойишлар бўлиб ўтди

Шанба куни АҚШ бўйлаб минглаб одамлар президент Дональд Трамп ва унинг маъмурияти сиёсатига норозилик билдириш учун кўчаларга чиқди.

Бу ҳақда якшанба куни BBC хабар берди.

Қайд этилишича, норозилик Трампнинг хатти-ҳаракатлари, хусусан, тарифлар ва унинг ҳукумат ходимлари сонини қисқартириш ва Ҳукумат самарадорлиги департаментини (DOGE) яратиш орқали бюджет харажатларини камайтириш ташаббуси билан юзага келган.

Намойишчилар Британия ҳукмронлигига қарши инқилоб йиллиги шарафига “Қироллар йўқ” деб ёзилган плакатларни ушлаб туришган, дейилади хабарда.

Хусусан, Бостонда Трампга қарши “50501” (“50 норозилик, 50 штат, 1 ҳаракат”) деб номланган норозилик акцияси бўлиб ўтди.

"Бу АҚШда эркинлик учун хавфли пайтлар. Мен невараларим мамлакатимиз қаердан келганини ва озодлик учун курашиш кераклигини билишларини истайман", - дейди митингга оиласи билан келган намойишчи Томас Бассфорд.

Шу ой бошида АҚШнинг қатор шаҳарларида ҳам Трамп юритаётган сиёсатдан норозилик туфайли оммавий норозилик намойишлари бўлиб ўтди.