АҚШ вице-президенти: "Исроилдаги бу ваҳима бироз ғалати"

Исроилнинг яқинда имзоланган АҚШ-Эрон ўртасидаги ўзаро англашув меморандумини танқид қилиши Вашингтондаги ишончсизликка асосланган ва келишув мазмунига зиддир.

Бу ҳақда АҚШ вице-президенти Жей Ди Вэнс The Times of Israel нашрига берган интервьюсида айтиб ўтди.

Унинг таъкидлашича, Исроил Вашингтон ва Теҳрон ўртасида эришилган келишувларга ҳаддан ташқари ҳиссий муносабат билдирмоқда.

"Мен Исроилдаги бу ваҳима бироз ғалати деб биламан, чунки бу ишончсизликдан келиб чиқади. Менимча, Америка бу ишончни қозонган", деди АҚШ вице-президенти.

Вэнс келишув Исроил учун зарарли эканлиги ҳақидаги даъволар фактлар билан тасдиқланмаганини айтди. Унинг фикрича, Исроил сиёсий тизими ва жамоатчилигидаги баъзи одамлар ишончсиз маълумотларга асосланиб, меморандумни нотўғри талқин қилмоқдалар.

У шунингдек, Эрон билан келишувлар Теҳрон ёки Ливан "Ҳизбуллоҳ" ҳаракатининг мавқеини мустаҳкамлаши ҳақидаги хавотирларни рад этди. Вэнснинг сўзларига кўра, баъзи исроиллик сиёсатчилар келишувнинг Теҳрон учун фойдали бўлган ҳар қандай қоидалари Эрон хатти-ҳаракатларида ҳеч қандай ўзгаришсиз амалга оширилади деб тахмин қилишади.

Вице-президент Қўшма Штатлар Исроилнинг позициясидан қатъи назар, Эронга нисбатан сиёсатни ишлаб чиқишда ўз миллий манфаатларидан келиб чиқишини таъкидлади.

Баъзи исроиллик сиёсатчиларнинг келишувга нисбатан танқидларига изоҳ берар экан, Ванс барча миллий хавфсизлик масалаларини фақат ҳарбий йўл билан ҳал қилиш мумкин эмаслигини таъкидлади.

У шунингдек, Исроил Бош вазири Беньямин Нетаньяху меморандумни очиқчасига танқид қилмаганини, гарчи унинг коалициясининг баъзи аъзолари, жумладан, миллий хавфсизлик вазири Итамар Бен-Гвир ва молия вазири Безалел Смотрич келишувга қарши чиқишганини таъкидлади.