АҚШ ва Қатар 1,2 триллион долларлик шартнома имзолади

АҚШ ва Қатар 1,2 триллион долларлик шартнома имзолади.

Бу ҳақда Оқ уй эълон қилган ҳужжатда айтилади, деб хабар беради “Репорт”.

"Бугун Қатарда АҚШ президенти Доналд Трамп Қатар билан камида 1,2 триллион долларлик иқтисодий битим имзолади. Президент Трамп, шунингдек, АҚШ ва Қатар ўртасида 243,5 миллиард доллардан ортиқ иқтисодий битимлар, жумладан, Qatar Airways авиакомпаниясига Боеинг самолётлари ва GE Aerospace двигателларини сотиш бўйича тарихий келишув имзоланганини эълон қилди", — дейилади хабарда.

Шундай қилиб, Qatar Airways 96 миллиард долларга 210 та замонавий Боеинг 787 Дреамлинер ва 777Х самолётларини сотиб олади. Шу билан бирга, шартнома имзолангандан сўнг Трамп келишув 200 миллиард долларга 160 дан ортиқ самолёт сотиб олишга тааллуқли эканини айтди. Бундан ташқари, Қатар 2 миллиард долларга Американинг General Atomics компаниясидан саккизта MQ-9B узоқ масофали учувчисиз учоқларни сотиб олади.

АҚШ ва Қатар икки томонлама ҳарбий алоқаларни янада мустаҳкамлаш ва 38 миллиард доллардан ортиқ салоҳиятли сармоя киритишга келишиб олди. Қайд этилишича, ушбу маблағларнинг бир қисми Қатарда жойлашган Американинг Яқин Шарқдаги энг йирик авиабазаси Ал Удейдга йўналтирилади.