АҚШ Тинчлик Кенгаши йиғилишида Ғазони қайта тиклаш бўйича кўп миллиард долларлик режани тақдим этади

АҚШ маъмурияти 19 февраль куни Вашингтонда бўлиб ўтадиган Тинчлик Кенгашининг биринчи йиғилишида Ғазо секторини қайта тиклаш бўйича кўп миллиард долларлик режани тақдим этади.

Бу ҳақда Reuters ахборот агентлиги исми ошкор қилинмаган АҚШ расмийларига таяниб хабар берган.

Уларнинг сўзларига кўра, АҚШ президенти Дональд Трамп йиғилишда Фаластин анклавини қайта тиклаш учун "миллиард долларлик жамғарма" ташкил этилишини эълон қилади. Жамғарма Тинчлик Кенгашига аъзо мамлакатларнинг "сахий хайриялари" ҳисобидан молиялаштирилади. "Одамлар бизга таклифлар билан келишди. Президент йиғилган маблағларни эълон қилади", деб қўшимча қилди манба.

Нашрнинг таъкидлашича, АҚШ томони шунингдек, бир нечта мамлакатлар келгуси ойларда Ғазо секторида жойлаштирилиши кутилаётган барқарорлаштириш кучларига "бир неча минг аскар" ажратишни режалаштираётганини эълон қилади.

Тинчлик Кенгаши йиғилишида камида 20 та давлат вакиллари, жумладан, уларнинг раҳбарлари иштирок этади. Унда Ғазо секторига, жумладан, анклавни бошқариш билан боғлиқ масалаларга эътибор қаратилади.