АҚШ Суриядаги яна иккита базадан қўшинларини олиб чиқиб кетди

АҚШ ҳарбийлари Сурия шимоли-шарқидаги яна иккита ҳарбий базани тарк этди.

Бу ҳақда Reuters агентлиги хабар берди.

Унга кўра, Суриянинг Хасака вилоятидаги Ал-Вазир ва Телл Бейдар базалари ҳозирда “Сурия демократик кучлари”нинг кичик бўлинмалари томонидан қўриқланмоқда. Маълумотларга кўра, Америка контингенти "яқинда объектларни тарк этган".

СДК қўмондони Мазлум Абди агентликка берган изоҳида, ҳудудда қолган бир неча юз америкалик аскарнинг мавжудлиги "ИШИД таҳдидини ушлаб туриш учун етарли эмас"лигини таъкидлади. Унинг сўзларига кўра, сўнгги ҳафталарда гуруҳ жангариларининг фаоллиги “сезиларли даражада ошган”.

Эслатиб ўтамиз, 3 июнь куни Пентагон вакили Саудиянинг Al Arabiya телеканалига АҚШ Суриядаги иккита ҳарбий базани ёпгани ва яна бирини СДК назоратига ўтказгани ҳақида маълум қилганди.