АҚШ Сенати Россияга қарши санкцияларни кўриб чиқишни кейинроққа қолдирди

АҚШ Сенати, эҳтимол, ёз охиригача Россияга қарши янги санкциялар тўғрисидаги қонун лойиҳасини қабул қилмайди.

Бу ҳақда The Hill нашри хабар бермоқда.

Таъкидланишича, Сенат август ойи бошида ўз ишини якунлайди ва сенаторлар ўз штатларига боради. Улар Вашингтонда фақат сентябрь ойи бошида иш бошлайдилар.

"Республикачи сенаторлар Россияга қарши кенг кўламли санкциялар тўғрисидаги қонун лойиҳасини қабул қилмасдан туриб Вашингтонни тарк этишга ҳозирлик кўрмоқда", — дейилади мақолада.

Нашрнинг ёзишича, айрим сенаторлар танаффусга чиқишдан олдин қонун лойиҳасини қабул қилиш тарафдори бўлган, бироқ якунда бу масала бўйича қарорни АҚШ президенти Дональд Трампга топширишган. Шундай қилиб, Америка етакчиси Россия ва унинг савдо ҳамкорларига қарши санкциялар қўллаш таҳдидларини амалга ошириш ёки йўқлигини ўзи ҳал қилиши керак бўлади.

Шу билан бирга, деб ёзади газета, кўпчилик демократлар Трамп буни тўлиқ бажармайди, деб ҳисоблайди. Аввалроқ Трамп Вашингтон Москва билан Россия-Украина можаросини 10 кун ичида ҳал қилиш бўйича келишувга эришмоқчи эканлигини, акс ҳолда Россия Федерациясидан импорт қилинадиган товарларга божхона солиғи жорий этиш билан таҳдид қилишини айтганди.