АҚШ Эроннинг Ҳормуз бўғозини назорат қилишини қабул қилиб бўлмайдиган сценарий деб ҳисобламоқда

Эроннинг Ҳормуз бўғозини назорат қилиши Вашингтон учун қабул қилиб бўлмайдиган сценарийдир.

Бу ҳақда АҚШ энергетика вазири Крис Райт CNBC телеканалига берган интервьюсида таъкидлаб ўтди.

"Халқаро ҳамжамият ҳеч қандай ҳолатда Эроннинг Ҳормуз бўғозини назорат қилишига йўл қўймаслиги керак, бу сўнгги ўн йилликларда вақти-вақти билан содир бўлганидек. Бизга бўғоз орқали тўсиқсиз юк ташишнинг қатъий кафолатларини таъминлайдиган натижа керак - бу нафақат Қўшма Штатлар, балки барча Форс кўрфази давлатлари, Осиё ва Европа мамлакатлари ва бутун халқаро ҳамжамият манфаатларига мос келади", деб таъкидлади Райт.

Аввалроқ АҚШ президенти Дональд Трамп Вашингтон ва Теҳрон ўртасида давом этаётган музокараларда келишувга эришилган тақдирда Ҳормуз бўғози дарҳол қайта очилишига ишонч билдирган эди. Унинг сўзларига кўра, Вашингтон Теҳрон билан Яқин Шарқдаги можарони "тўлиқ ҳал қилиш" бўйича "жуда яхши" музокаралар олиб борган. Эрон ўз навбатида АҚШ билан тўғридан-тўғри алоқада бўлмаганлигини даъво қилмоқда.