Аляска — бу Путиннинг шахсий ғалабасими?

Владимир Зеленский АҚШда бўлиб ўтадиган Дональд Трамп ва Владимир Путин учрашувини Россия етакчисининг “шахсий ғалабаси” деб атади.

Украина президенти таъкидлашича, Америка ҳудудида бўлиб ўтадиган учрашув Путинни “изоляциядан чиқаради” ва Трамп Москвани урушни тўхтатишга мажбур қилмаса, киритилиши керак бўлган янги санкцияларни кечиктиради.

Зеленский, шунингдек, АҚШнинг махсус вакили Стив Уиткоффдан ўт очишни тўхтатиш бўйича “биринчи сигнал” олганини маълум қилди, аммо тафсилотларни очиқламади.

Саммит шу жума куни Аляскада бўлиб ўтади ва бу Россия ҳамда АҚШ президентлари ўртасидаги 2021 йилдан буён илк учрашув бўлади. Трамп Украина урушига барҳам беришга умид қилмоқда ва Москва билан икки томонлама алоқаларни йўлга қўймоқчи.

Зеленский бу музокараларда иштирок этмайди — у ҳозирча таклиф қилинмаган. Франциянинг AFP ахборот агентлигига берган интервьюсида Украина етакчиси ўз хавотирларини билдирган ҳолда, Путин қаттиқ шартлар қўйишидан, Трамп эса Украина ҳудудларини бериш эвазига келишувга рози бўлишидан хавотирда эканини тан олди.

“Биз Донбассдан чиқмаймиз. Агар биз бугун баландликлар ва мустаҳкамланган жойларни тарк этсак, русларга янги ҳужум учун пойдевор яратиб берамиз”, — деди Украина президенти.

Саммитга тайёргарлик ишлари аллақачон бошланган. Россия ташқи ишлар вазири Сергей Лавров АҚШ давлат котиби Марко Рубио билан бўлажак учрашувнинг боришини муҳокама қилди. Трамп вакили Кэролайн Левиттнинг айтишича, саммитнинг асосий мақсади — “урушни қандай тугатиш мумкинлигини тушуниш”.

Бу орада фронтда россияликлар Доброполье яқинида 10 км олдинга силжишди ва Покровск томонидаги учта йўналишда янги ҳужумларга тайёргарлик кўрмоқда. Бу ҳудуд Донбассдаги асосий стратегик ва логистика маркази ҳисобланади, Россия уни ярим йилдан бери эгаллашга уринаётган эди.

Урушгача 30 минг аҳолига эга бўлган Доброполье мунтазам равишда дрон ҳужумларига учрамоқда. Ҳужум хавфи вайрон бўлган Константиновкага ҳам таҳдид солмоқда — бу Донецк вилоятида Киев назоратида қолган сўнгги йирик шаҳарлардан биридир.