Air India авиаҳалокати: ёқилғи узатилиши ўчирилгани тасдиқланди, 260 киши ҳалок бўлган

Ҳиндистонда Air India’нинг AI171 рейси билан боғлиқ авиаҳалокатни текшириш доирасида тажовузкор воқеалар аниқланди. Ҳалокатда 260 киши ҳалок бўлган. Ҳиндистоннинг Авиаҳалокатларни текшириш бюроси (AAIB) тайёрлаган дастлабки ҳисоботга кўра, учувчилар кабинасидаги ҳар икки ёқилғи узатиш калити учишдан бир неча сония ўтиб кетма-кет ўчирилган — бу эса муҳаррикларга ёқилғи етиб боришини тўхтатган.

Охирги сўзлар кабинадаги ёзув қурилмасида қайд этилган. Бир учувчи: «Нима учун сен ўчирдинг?» деб сўраган. Иккинчиси: «Мен қилмадим», — деб жавоб берган. Ҳозирча сўзловчилар аниқланмаган, лекин учиш вақтида самолётни иккинчи учувчи бошқаргани, капитан эса назорат қилгани маълум.

Ҳисоботда таъкидланишича, ёқилғини тасодифан ўчириш деярли мумкин эмас: калитларни «ўчирилган» ҳолатга ўтказиш учун аввал кўтариб, сўнгра буриш керак — бу амалиёт одатда ерда амалга оширилади. Шундан сўнг пилотлардан бири муҳаррикларни қайта ишга туширишга уринган, аммо 15 сония ўтиб, самолёт ерга урилган ва портлаган.

2018 йил декабрида АҚШ Федерал авиация маъмурияти (FAA) Boeing 737 ва 787 моделларидаги ёқилғи калитларида блокировка носозлиги бўлиши мумкинлиги ҳақида огоҳлантирган. Air India эса бу текширувни ўтказмаган, чунки у мажбурий эмас, фақат тавсия этилган деб ҳисобланган.

Бу ҳалокат авиация хавфсизлиги соҳасида жиддий саволларни кўндаланг қўймоқда — айниқса, учувчилар тайёргарлиги ва техник хизмат кўрсатиш тартиби борасида.