«Афросиёб»даги ёнғин ҳақида маълумот берилди

"Афросиёб" поездининг манёвр локомотивидаги ёнғин ҳақида маълумот берилди.

Ижтимоий тармоқларда “Афросиёб” тезюрар электропоездида содир бўлган ёнғин акс этган видео тарқалмоқда. “Ўзбекистон темир йўллари” АЖ бу бўйича расмий баёнот берди.

Унда айтилишича, ёнғин фақат поездни ташиш бўйича ёрдамчи ишларни бажарувчи манёвр локомотивига таъсир қилган. “Афросиёб” поездининг ўзи ёнғинга учрамаган ва эртага жўнаб кетади.

Ёнаётган тепловоз ичида йўловчилар борлиги ҳақидаги даъволар нотўғри. Ҳодиса рейсдан ташқарида содир бўлган ва ўша пайтда поезд йўловчиларни ташимаган.

Ёнғин бартараф этилган.

"Афросиёб" юқори тезликдаги электр поездининг барча рейслари жадвалда ўзгаришсиз амалга оширилади.

Ёнғин сабаблари ва бошқа тафсилотлари ҳақида кейинроқ яна маълум қилинади.