Афғонистон фуқароси АҚШда террорчилик таҳдиди яратишда айбланиб ҳибсга олинди

Афғонистон фуқароси АҚШда террорчилик таҳдидларини тарқатишда айбланди.

Бу ҳақда АҚШ ички хавфсизлик департаментига таяниб, Fox News телеканали маълум қилди.

Афғонистон фуқароси Муҳаммад Довуд Алокозай 25 ноябрь куни TikTok платформасида Форт-Уэрт шаҳрида (Техас штати) портлатиш учун бомба йиғаётганини тахмин қилган видеони жойлаштирганидан сўнг ҳибсга олинган эди. Айбланувчи АҚШнинг собиқ президенти Жо Байден даврида АҚШ қўшинлари мамлакатдан олиб чиқилиши ортидан Вашингтоннинг афғон иттифоқчиларини кутиб олиш дастури бўйича АҚШга келган.

Худди шу дастур 2021 йилда Афғонистон фуқароси Раҳмонуллоҳ Лақанвални ҳам АҚШга олиб келди. У шу йилнинг 26 ноябрида Вашингтонда Миллий гвардия аскарларига қарата ўт очди. Миллий гвардиянинг икки аскари ва ҳужумчи яраланиб, касалхонага ётқизилган. Кейинроқ аскарлардан бири олган жароҳатларидан вафот этди.

Вашингтонда Миллий гвардия аскарларига уюштирилган ҳужум ортидан АҚШ ҳукумати Афғонистон фуқаролари учун визани тўхтатиб қўйди ва чет эл фуқароларининг бошпана сўровларини кўриб чиқишни вақтинча тўхтатди.