100 нафар россиялик ҳарбий хизматчи қочишга уринган

Краснодарда ўз бўлинмаларини ўзбошимчалик билан тарк этган 100 га яқин россиялик ҳарбий хизматчи ҳарбий комендатура ҳудудидан қочишга ҳаракат қилган.

Бу ҳақда Baza Телеграм-канали хабар бермоқда.

Канал маълумотларига кўра, маҳаллий комендатуранинг ўраб олинган участкаларидан бирида Украинадаги урушда иштирок этганидан сўнг қисмни ўзбошимчалик билан тарк этган ҳарбий хизматчилар сақланмоқда. 18 апрель куни кечқурун уларнинг юзга яқини тўсиқни бузиб, комендатуранинг ўзига кириб олган.

"Дастлабки маълумотларга кўра, қочқинлар қуролсиз бўлган. Қурбонлар ва жабрланганлар йўқ," - дея аниқлик киритади База.

Улардан бирортаси ҳудудни тарк этишга эришгани ҳали номаълум.

Жойни Росгвардия аскарлари ва полиция қуршаб олган.